كتبت دكتوره رباب محمد
في مرحلة ما من حياتي… كنت مؤمنة إن النية الطيبة كفاية.
إنك تتعامل بنقاء، بحسن ظن، من غير حسابات… ده في حد ذاته كفيل يخلق علاقات صح.
لكن الحقيقة؟ مش دايمًا.
في ناس بتشوف طيبتك فرصة…
مش قيمة.
بتقابل وضوحك بغموض، وصدقك بحسابات، وهدوءك بلعب أدوار.
وأصعب إحساس مش إنك اتأذيت…
لكن إنك فجأة مش عارفة ترجعي لنفسك القديمة.
مش عارفة تتعاملي بنفس العفوية، ولا تثقي بنفس السرعة، ولا تدي بنفس السخاء.
بتبقي واقفة في النص…
بين نسخة منك كانت بتدي بدون خوف،
ونسخة جديدة بتفكر ألف مرة قبل أي خطوة.
التخبط ده مؤلم…
لأنك مش عايزة تبقي قاسية،
بس في نفس الوقت مش قادرة تبقي نفس الشخص اللي اتقرص قبل كده.
بس مع الوقت فهمت حاجة مهمة جدًا:
إن الحدود مش قسوة…
وإن الوعي مش شك…
وإن مش كل الناس تستحق نفس المساحة في حياتك.
اتعلمت إن: مش كل اللي يبتسم لك صافي،
ومش كل اللي قريب منك أمين،
ومش كل اللي شاركك وقت… يستحق يشاركك طريق.
اتعلمت إني أبطّأ…
أراقب…
أدي على قد اللي قدامي يستحقه، مش على قد قلبي.
واتعلمت إن البُعد أحيانًا مش ضعف…
ده حماية.
وإن تقليل الدوائر مش خسارة…
ده وعي.
يمكن مبقتش بعفوية زمان،
بس بقيت أهدى… أوضح… وأصدق مع نفسي.
وبقيت عارفة كويس جدًا:
إن اللي يدخل حياتي النهارده… لازم يحترمها.
مش كل درس بيبقى سهل،
بس بعض الدروس… بتغيّرك للأفضل، حتى لو وجعتك في الأول.
