رمضان و العزائم

بقلم / شروق يسري

كل سنة وأنتم طيبين....شهر رمضان وصل وهذا الشهر تكثر فيه العزومات وتحتار السيدات ماذا تقدم وكيف؟؟؟

طبعا رمضان شهر كله خير وبركة وكله عزائم؛ وولائم في منتهى الجمال...

وطبعا كل يوم والتاني عندك عزومة شكل وأكيد قبل العزومة تبقي محتارة مش عارفة تعملي إيه وتقدمي إيه ونفسك تقدمي أحلى حاجة عندك..ونفسك كمان تخلصي الأكل بدري قبل أذان المغرب على الأقل بساعتين.لكي تستطيعي تغيري ملابسك؛ وتستقبلي المعزومين..ما هو مش معقول الضيوف ييجوا يلاقوكِ قاعدة لسه في المطبخ بتطلعي حاجات من الفرن وبتدخلي حاجات تانية....مش كده ولا إيه؟؟؟؟

طبعا تسألي نفسك دلوقتي وتقولي أزاي كل ده يحصل؟ ده أنا لما بيكون عندي عزومة اصحي من الفجر وأفضل طول النهار قاعدة في المطبخ ويا دوب اخلص الأكل ساعة الأذان؛ وعشان تباني قدام ضيوفك ست بيت من الدرجة الأولى

هأقولك دلوقتي على طريقة سهلة جدا للاستعداد لعزومات رمضان...يلاّ نشوف مع بعض....

أولا: اقعدي مع نفسك

شوفي يا ستي الاستعداد للعزومة بيكون قبلها بيومين بأنك تقعدي مع نفسك كده وتشوفي عدد المعزومين قد إيه؟؟؟ وعلى الأساس ده بتحددي كمية الأكل اللي أنت تعمليها وخدي بالك إن لو كان عدد المعزومين قليل يعني مثلا 3 أفراد يبقى عدد الأصناف قليل ومحدود...

لكن لو عدد المعزومين كبير يبقى فيه تنوع في الأصناف المقدمة وده عشان ترضي جميع الأذواق...

ثانياً: هاتي ورقة وقلم

وبعد ما حدادتي عدد المدعوين للعزومة هاتي ورقة وقلم واكتبي قائمة بالأصناف اللي المفروض تكون موجودة على السفرة.. ودي نسخة من القائمة اللي ممكن إنك تعمليها في أي عزومة..

• أولا السلطات: شوفي يا ستي المفروض يكون عندك على السفرة في أي عزومة نوعين من السلطات وليكن مثلا طبق سلطة طحينة وطبق سلطة خضراء.

• ثانيا الشوربة: كفاية قوي في عزومة رمضان وجود نوع واحد من الشوربة خاصة كمان لو كان عدد المعزومين مش كبير.

• ثالثا اللحوم: طبق اللحوم ده يعتبر من الأطباق الرئيسية على السفرة عشان كده لازم يكون على السفرة في أي عزومة نوعين من اللحوم وليكن مثلا طبق بوفتيك لحمة وطبق فراخ مشوية.

• رابعا النشويات: النشويات زي الرز أو المكرونة أو الرقاق أو المحشي وخدي بالك إن المفروض يكون على السفرة نوع واحد من النشويات.. يعني إما مكرونة أو رز، مش معقول الاثنين.

• خامسا الخضار: كفاية قوي صنف واحد من الخضار على السفرة خاصة إن الإقبال على الخضار بيكون مش كبير قوي في العزومات.

• سادسا الحلويات: أكيد لو عندك عزومة تقضي وقت كبير جدا في عمل الأكل عشان كده اختاري الحلويات السهلة في التحضير أو اختاري الأصناف اللي ممكن إنك تعمليها قبلها بيوم... زي البسبوسة أو أي نوع من الحلويات اللي تتقدم باردة زي الآيس كريم..

ثالثا: التحضير الفعلي للعزومة

بعد ما جهزت قائمة بالأصناف اللي أنتِ ناوية تعمليها في العزومة عليكِ ببدء التحضير الفعلي للعزومة؛ وخدي بالك إنك تحضري ده قبلها بيوم.

طبعا تسألي نفسك دلوقتي وتقولي أزاي أحضر الأكل قبلها بيوم، كده الأكل يبوظ خاصة إن الجو حر...شوفي يا ستي.. دي الحاجات اللي ممكن إنك تعمليها قبل العزومة بيوم:

1- العصائر ممكن إنك تعمليها وتحطيها في كوباية العصير وتحطيها في الثلاجة أو تحطيها في أكياس وتحطيها في الفريزر وتطلعيها قبل المغرب بخمس ساعات.

2- جهزي أدوات المطبخ بتاعتك زي "الصواني والأطباق والكوبايات والكاسات" وتأكدي من نظافتها بحيث إنها تكون جاهزة على الاستعمال.

3- لو ناوية تعملي محشي ممكن إنك تجهزيه وتلفيه وتحطيه في الثلاجة بحيث يكون جاهز على التسوية يوم العزومة.

4- لو هاتقدمي في العزومة لحمة أو فراخ مشوية ممكن أنك تتبليهم ببصل قبل العزومة بيوم وتحطيهم في وعاء بلاستيك وتتركيهم في الثلاجة بحيث يكونوا جاهزين على الشواء يوم العزومة.

5- لو ناوية تعملي مكرونة بالبشاميل أو جلاش باللحمة المفرومة يبقى يا ريت إنك تعصجي اللحمة قبلها بيوم.

6- الحلويات ممكن إنك تعمليها قبل العزومة بيوم وتحطيها في الثلاجة ومن الحلويات اللي ممكن إنك تعمليها الآيس كريم والبسبوسة والبقلاوة.. وخدي بالك إنك تغطي صينية البسبوسة أو البقلاوة كويس.

رابعا: يوم العزومة نفسه

أكيد لو جهزتِ الحاجات دي زي ما قلنا ليكِ هتقومي يوم العزومة أعصابك مستريحة جدا وتبدئي في إنك تخرجي الحاجات اللي أنتِ جهزتيها من الثلاجة وتسويها وفي الوقت اللي الحاجة فيه تستوي ممكن إنك تعملي السلطة وخدي بالك إنك تحطي الأكل اللي يستوي بدري في أواني حرارية عشان يفضل محتفظ بسخونته...وبكده فعلا تخلصي كل حاجة قبل أذان المغرب بساعتين وتقدري تستقبلي ضيوفك وأنتي أعصابك مستريحة قوي..

وكل رمضـــــان وأنتم متجمعين علي خيـــــــر